સવેરા ગુજરાત,વડોદરા, તા.૪
રવિવારે સવારે વડોદરાના પાદરા-જંબુસર રોડ પર ટેન્કર અને ટ્રક વચ્ચે અકસ્માત બાદ ભીષણ આગ ફાટી નીકળી હતી. જેમાં કુલ ૩ લોકોના મોત થયાના અહેવાલ મળ્યા છે. પ્રાપ્ત માહિતી અનુસાર મૃતકોમાં બે ક્લીનર સહિત ૩ લોકોના સમાવેશ થાય છે. આગ લાગતા જ ક્લીનર સહિત ૩ લોકો જીવતા ભડથું થઈ ગયા હતા. બનાવને પગલે રોડ પરથી પસાર થતાં અન્ય વાહનચાલકોએ ભારે ટ્રાફિકજામનો સામનો કરવો પડ્યો હતો. કારણ કે, રોડની વચ્ચોવચ્ચ આ દુર્ઘટના સર્જાઈ હતી. બનાવને પગલે સ્થાનિક તંત્ર દોડતું થયું હતું અને આગને કાબૂ કરવા પ્રયાસ હાથ ધરવામાં આવ્યા હતા. ભારે જહેમત બાદ આગ કાબૂમાં આવતા મૃતદેહોને પોસ્ટમોર્ટમ માટે હોસ્પિટલ ખસેડીને પોલીસ દ્વારા આકસ્મિક મોતનો ગુનો દાખલ કરીને અકસ્માત કેવી રીતે સર્જાયો તેમજ મૃતકોની ઓળખ અંગેની દિશામાં તપાસ હાથ ધરવામાં આવી હતી. આ દરમિયાન આસપાસના લોકોએ અકસ્માતનો વિડીયો પોતાના મોબાઈલમાં કેદ કરીને સોશિયલ મીડિયા પર વાયરલ કર્યો હતો. જેના પરથી એવો અંદાજ લગાવી શકાય છે કે અકસ્માત કેટલો ગંભીર હતો?સ્થાનિક મીડિયા રિપોર્ટ અનુસાર રવિવારે વહેલી સવારે પાદરાથી ૨૫ કિલોમીટર દૂર પાદરા-જંબુસર રોડ ઉપર આભોર ગામની ચોકડી પાસે ટ્રક અને ટેન્કર વચ્ચે જાેરદાર ટક્કર થઈ હતી. આ ટક્કર થતાં જ પ્રચંડ ધડાકા સાથે જ ભીષણ આગ ફાટી નીકળી હતી. આગે વિકરાળ રૂપ ધારણ કરતા ટ્રક અને ટેન્કરના કેબિન પણ ઝપેટમાં આવ્યા હતા. આ દરમિયાન ડ્રાઈવર અને ક્લીનર કઈ સમજે તે પહેલા તેઓ પણ તેની લપેટમાં આવી ગયા અને મોતને ભેટ્યા હતા. બનાવની જાણ થતાં આસપાસના લોકો બચાવ કામગીરી માટે દોડી આવ્યા હતા. જાે કે, ત્યાં સુધી બહુ મોડું થઈ ગયું હતું.સોશિયલ મીડિયા પર વાયરલ વિડીયોમાં જાેઈ શકાય છે કે, બંને વાહનોની ટક્કર બાદ લાગેલી આગે વિકરાળ રૂપ ધારણ કર્યું હતું અને તેની જ્વાળાઓ પણ ઉપર સુધી જાેવા મળી. આ દરમિયાન દૂર દૂર સુધી ધૂમાડાના ગોટેગોટા પણ દેખાયા હતા. બનાવને પગલે થોડા સમય માટે ટ્રાફિકજામની સ્થિતિ પણ સર્જાઈ હતી. હાલ સ્થાનિક પોલીસ દ્વારા મૃતકોની ઓળખ સહિતની દિશામાં તપાસ કરવામાં આવી રહી છે. બીજી તરફ આ અકસ્માત કેવી રીતે સર્જાયો તે હજી સુધી જાણી શકાયું નથી.બનાવની જાણ થતાં પાદરા ફાયરબ્રિગેડની ટીમે ઘટનાસ્થળે દોડી ગઈ હતી. આ ઉપરાંત વડુ પોલીસનો કાફલો પણ આવી પહોંચ્યો હતો. ફાયરબ્રિગેડ દ્વારા ભારે જહેમત બાદ આગ પર કાબૂ મેળવાયો હતો અને પોલીસની મદદથી ટ્રક અને ટેન્કરના અકસ્માતમાં મોતને ભેટેલા ડ્રાઈવર અને ક્લીનરના મૃતદેહો બહાર કાઢીને સ્થાનિક હોસ્પિટલમાં પોસ્ટમોર્ટમ માટે ખસેડવામાં આવ્યા હતા. હજી સુધી મૃતકો અંગે કોઈ માહિતી સામે આવી નથી. જેથી પોલીસ દ્વારા તેમની ઓળખની દિશામાં તપાસ ચાલુ હોવાનું મીડિયા રિપોર્ટના આધારે જાણવા મળ્યું છે. ઘટનાને લઈને સમગ્ર વિસ્તારમાં ચકચાર મચી જવા પામી છે.