સવેરા ગુજરાત/પટના,તા. 28 : લીંબુના ભાવમાં બેફામ ભાવવધારા વચ્ચે દેશભરમાં જબરો ઉહાપોહ ચાલી જ રહ્યો છે તેવા સમયે માત્ર એક નંગ લીંબુ માટે યુવતીની હત્યા થઇ ગયાનો અત્યંત ચોંકાવનારો કિસ્સો પ્રકાશમાં આવ્યો છે. બિહારના ચંપારણના ચીનપુર ગામમાં બનેલા હત્યાના બનાવમાં એક નંગ લીંબુ માટે સાસુ અને નણંદે પુત્રવધુની હત્યા કરી નાખી હતી.
પુત્રવધુએ લીંબુના ઝાડ પરથી એક લીંબુ તોડતા સાસુ-નણંદ સાથે ઝઘડો થયો હતો તેમાં સાસુ અને નણંદે ભેગા થઇને પુત્રવધુની હત્યા કરી નાખી હતી. હત્યાના આ બનાવ બાદ સાસુ અને નણંદ નાશી છુટ્યા છે. બંનેને પકડવા માટે પોલીસે પગેરુ દબાવ્યું છે. આ મામલે ચંપારણ પોલીસ દ્વારા હત્યાનો ગુનો દાખલ કરીને કાયદેસરની કાર્યવાહી કરી છે. એક લીંબુના કારણએ હત્યા થયાના આ બનાવથી સમગ્ર રાજ્યમાં ખળભળાટ સર્જાયો છે.