મુંબઈ, તા.૨૧
ભારતીય શેરબજાર માટે બુધવારનો દિવસ ખોટનો દિવસ હતો. ૩૦ શેરો ધરાવતો બીએસઈ બેન્ચમાર્ક સેન્સેક્સ ૬૩૫.૦૫ પોઈન્ટ્સ અથવા ૧.૦૩ ટકા ઘટીને ૬૧,૦૬૭ પર બંધ થયો હતો. નિફ્ટી ૧૮૬.૨૦ પોઈન્ટ અથવા ૧.૦૧ ટકાના ઘટાડા સાથે ૧૮,૧૯૯ પર બંધ થયો હતો. શેરબજારના બંને મુખ્ય સૂચકાંક દિવસના અંતે ઘટાડા સાથે બંધ થયા હતા. સેન્સેક્સ ૬૧૦૬૭ પોઈન્ટ અને નિફ્ટી ૧૮૧૯૯ પોઈન્ટ પર બંધ થયા છે. શેરબજારમાં ભારે ઘટાડાથી રોકાણકારોને રૂ. ૪ લાખ કરોડથી વધુનું નુકસાન થયું છે. મંગળવારે શેરબજારના બંધ સમયે બીએસઈ પર લિસ્ટેડ કંપનીઓની કુલ માર્કેટ કેપિટલાઇઝેશન (માર્કેટકેપ) રૂ. ૨,૮૭,૩૯,૯૫૮.૦૯ કરોડ હતી. જે બુધવારના ટ્રેડિંગ સત્રના અંતે રૂ. ૨,૮૨,૮૬,૧૬૧.૯૨ કરોડ હતી. બુધવારે દિવસની શરૂઆત શેરબજારમાં વધારા સાથે થઈ હતી. સેન્સેક્સ ૧૬૭.૩૯ પોઈન્ટના વધારા સાથે ૬૧૮૬૯.૬૮ પર ખુલ્યો હતો. નિફ્ટી ૫૩.૩૦ પોઈન્ટ અથવા ૦.૨૯ ટકા વધીને ૧૮૪૩૮.૬૦ પર ટ્રેડ કરી રહ્યો હતો.સન ફાર્મા, એચસીએલ ટેક્નોલોજી, ટાટા કન્સલ્ટન્સી સર્વિસીસ, ટેક મહિન્દ્રા, નેસ્લે, વિપ્રો અને ઈન્ફોસિસ આજે નિફ્ટીમાં ટોપ ગેઇનર્સમાં હતા, જ્યારે ઈન્ડસઈન્ડ બેંક, બજાજ ફિનસર્વ, મારુતિ, અલ્ટ્રાટેક સિમેન્ટ, ટાટા મોટર્સ, એક્સિસ બેંક, સ્ટેટ બેંક ઓફ ઈન્ડિયા અને કોટક મહિન્દ્રા બેંક ટોપ લુઝર રહી હતી.સિઓલ, ટોક્યો અને શાંઘાઈના ઈક્વિટી બજારો નુકસાન સાથે સમાપ્ત થયા હતા, જ્યારે હોંગકોંગમાં વધારો થયો હતો. મધ્ય સત્રમાં યુરોપમાં ઇક્વિટી એક્સચેન્જાે હકારાત્મક ઝોનમાં ટ્રેડ થઈ રહ્યા હતા. મંગળવારે યુએસ બજારો ઉછાળા સાથે બંધ થયા હતા. એલકેપી સિક્યોરિટીઝના રિસર્ચ હેડ એસ રંગનાથને જણાવ્યું હતું કે ચીન અને અન્યત્ર કોવિડના ભયને કારણે બેન્ચમાર્ક સૂચકાંકો ફરી ઘટ્યા છે.યુએસ ડોલર સામે રૂપિયો ૧૦ પૈસા ઘટીને ૮૨.૮૦ ના સ્તર પર બંધ થયો હતો. ઇન્ટરબેંક ફોરેક્સ માર્કેટમાં, સ્થાનિક યુનિટ ગ્રીનબેક સામે ૮૨.૭૬ પર નબળું ખુલ્યું હતું અને ૮૨.૬૬ની ઇન્ટ્રા-ડે હાઇ અને ૮૨.૮૩ની નીચી સપાટીએ ટ્રેડ થયું હતું. દરમિયાન, મુખ્ય પ્રતિસ્પર્ધીઓ અને વિદેશી ભંડોળના પ્રવાહ સામે નબળા ગ્રીનબેકને કારણે સ્થાનિક એકમને ટેકો મળ્યો અને નુકસાનમાં ઘટાડો થયો.